КАМІНСКІ Мсціслаў Адамавіч (28.04.1839 г., Вількамірскі павет Віленскай губерні – 12.11.1868 г.) этнограф, фалькларыст і публіцыст. Вучыўся ў Варшаўскай медыка-хірургічнай акадэміі (1860-1862). Супрацоўнічаў у газеце «Kurier Wilenski», часопісе «Tygodnik ilustrovany», «Klosy», «Biblioteka Warszawska» і інш.

Даследаваў матэрыяльную і духоўную культуру беларускага, літоўскага і польскага народаў. У артыкуле «Дзяды» (1862 г.), «Танцы люду з-над Віліі» (1864 г.), «Прыказкі люду з-над Віліі» (1866 г.), «Некалькі словаў пра звычаі насельніцтва ў Мінскай губерні», абразках «Уражанні з падарожжа», «Успамін аб Міншчыне» (усе 1867 г.) і інш. падаў цікавыя звесткі пра побыт, абрады, звычаі, адзенне і фальклор беларусаў. Аўтар працы «Аб паэтычных уяўленнях літоўска-крывіцкага народа ў яго песнях» (1867 г.), у якой адзначыў паэтычнасць беларускіх народных песень.