ГАНАК – крытая прыбудова з прыступкамі, апорнымі слупкамі перад уваходнымі дзвярамі. Да сярэдзіны 19 ст. ў вясковым будаўніцтве на Беларусі ганак як элемент хаты не тыповы. Звычайна над уваходам рабілі казырок, клалі каля парога вялікі камень, стары жорнавы, масіўную калоду.


У канцы 19 ст. сустракаўся ганак у выглядзе невялікай дашчанай пляцоўкі з прыступкамі і 1- ці 2-схільнай стрэшкай на 2 або 4 слупах (адкрыты). Радзей сустракаўся ганак з поручнямі і лаўкамі.

У канцы 19 – пачатку 20 ст. пашырыліся глухія і кратаваныя напаўзакрытыя ганкі, у якіх прастору паміж падлогай пляцоўкі і поручнямі зашывалі абчэсанымі жэрдкамі, дошкамі ці аполкамі.


У наш час ганкі робяць амаль пры кожнай хаце, прыбудоўваюць і да веранд. Апорныя слупкі і франтоны часта аздабляюць разьбой. Будуюць ганкі на цагляным (радзей каменным) падмурку з прыступкамі. Часам да закрытага ганку прырабляюць дзверы; тады ў яго бакавых сценках абавязкова праразаюць акенцы.