Кажадуб Алесь нарадзіўся 27 верасня 1952 года ў г.
Ганцавічы у сям'і служачых. Пасля заканчэння сярэдняй школы вучыўся на аддзяленні рускай мовы і літаратуры Беларускага дзяржаўнага ўніверсітэта. Пасля заканчэння галоўнай ВНУ рэспублікі некаторы час працаваў настаўнікам у вёсцы Крайск
Лагойскага раёна. Але Алеся пастаянна цягнула да творчай работы. Пасля Крайска ён два гады працаваў навуковым супрацоўнікам Інстытута мовазнаўства імя
Якуба Коласа, Акадэміі навук
БССР, потым чатыры гады — рэдактарам літаратурна-драматычных праграм рэспубліканскага тэлебачання, а з 1983 года — літсупрацоўнікам аддзела публіцыстыкі часопіса «Маладосць».
Сваё першае апавяданне Алесь Кажадуб апублікаваў у 1976 годзе ў часопісе «Маладосць». Апавяданне і аповесць сталі любімымі жанрамі пісьменніка. У 1980 годзе пабачыла свет яго першая кніжка прозы «Гарадок». Аповесць цалкам прысвечана Ганцавічам, яго працавітым і самабытным людзям. Гэтай кнігай Алесь як бы аддаў даніну павагі гораду, які адкрыў яму дарогу ў вялікае жыццё.
Пасля гэтага Алесь Кажадуб выдаў кнігі прозы «Размова», «Лесавік», «Дарога на замчышча», «Святы калодзеж» і іншыя. Многія творы А.Кажадуба перакладзены на рускую і ўкраінскую мовы.
У 1985 годзе пісьменнік скончыў Вышэйшыя літаратурныя курсы ў Маскве. З тае пары і жыве ў сталіцы Расійскай Федэрацыі. Але тэма Беларусі не сыходзіць з яго літаратурных твораў.
Алесь Кажадуб — член Саюза беларускіх пісьменнікаў.